STAFF'S NOTES

主角永遠都係最後登場
Hin, 01-03-2019

Sony 上年發佈嘅過萬元級入耳式耳機 IER-Z1R,到今年大部分時間都仍然係高人氣作品,咁佢有咩咁令人期待呢,咁就要講下佢用咗咩技術而聲音又如何啦。

IER-Z1R 嘅超高音動圈單元就採用咗全新鍍鋁 LCP 振膜同埋外部磁性電路,令大家可以聽到好強勁又細膩嘅超高頻表現同埋延伸,而超高音動圈單元就放咗喺同噴嘴成同軸的位置上,咁樣就可以將精準嘅超高音直接傳輸至耳仔入面。

而另一個全頻動圈就採用咗 MDR-Z1R 嘅振膜結構,12 毫米動態驅動單元嘅振膜由鎂製圓頂和鍍鋁 LCP 組成,可以做到好似 MSR-Z1R 級數嘅深沉低音同精細嘅中高音。再加上全新開發嘅動鐵式驅動單元用上鎂振膜、鍍銀銅音圈同鍍金端子,可以帶比大家仔細嘅分析力。

開發過程經過無數次聽力測試,配合埋特別設計嘅微型電路,再加上專用薄膜電容器,令到失真再大大減少,而且全部嘅單元都用上音響級焊料,確保盡量提高訊號嘅透明度。外殻用上鋯合金,令 IER-Z1R 更加堅固,絕對經得起時間考驗。

聲音方面有好多朋友都有好大「差別」嘅聽感,最主要原因為耳膠嘅大細同埋外殻是否同耳仔完全貼合。如果揀啱耳膠,但外殻無法貼合又或者相反,喺聆聽嘅時候會發現聽感上會有缺失感,某啲細節甚至低頻都好似消失咗咁。

如果配備合適嘅耳膠,而外殻又完全貼合耳仔的話,將會係最好嘅聲音,強勁嘅低頻充滿層次同埋彈性,但又唔會過於強勁令人頭痛又或者掩蓋咗其他細節,直接嘅超高頻表現,細緻幼滑加上適量嘅微動態,樂曲嘅細微變化都充分地表現出嚟,而且動圈同動鐵互相交織下,中頻樂器表現出眾而且人聲富有質感。

可以將 3 種唔同設計大小嘅單元適合地配合互相交織,發揮出如此神奇而又豐富嘅聲音,可以見到 Sony 嘅工藝同埋對聲音嘅執著,只係唯一嘅美中不足係外殻很大,而且配戴得唔好會對聲音產生好大嘅影響,無法令任何人都可以欣賞到依隻咁傳奇嘅耳機。